26 مايو، 2012

مصر تتخلى عن ثورتها!

 

لا حول ولا قوة إلا بالله.. الناس كلها عندها ربع ضارب.. واحنا عندنا اتنين!
ربع فلول.. وربع اخوان
بعض الناس شايفين ان الاتنين مايتخيروش عن بعض
لكن طبعا هناك فرق.. صحيح ان الاتنين لعبوا لعبة قذرة في عقول الناس واستغلوا فقر ناس كتير
لكن الحق يقال الأولنيين دول قتلة وحرامية وفاسدين ونصابين..أما التانيين بتوع مصلحتهم وعشانها يبيعوا أبوهم
والاتنين شربنا منهم المر لما استكفينا..بس يظهر فيه ناس ماستكفتش 
زي الصرصار كده ترشه بالمبيد يتنحلك ويفضل واقف ويقولك كمااان
بس انا حقيقي استكفيت وقفاي ورم قوي عشان كده بصراحة انا اصلا ماروحتش الانتخابات 
بعد صراع كبير بين "اروح" "ما اروحشي" انتصرت ما اشاركش في هذه المهزلة انتخاب رئيس بدون صلاحيات يحطها هو على مزاجه وهو بيعمل الدستور..انتخابات تحت الحكم العسكري بعد كل اللي عمله فينا حنثق فيها برضه! سنة ونص من العبث واللخبطة كيف سيتم تتويجها في النهاية ؟ إن لم يكن بمزيد من العبث واللخبطة!
اكيد هناك من سيصف ما فعلته بالسلبية.. لكن الامتناع عن التصويت موقف برضه..يعني اللي ينتخب الفلول يقول انا حر واللي ينتخب الاخوان يقول انا حر وانا بقى مش حره في عدم المشاركة فيما آراه مهزلة
الناس بتقول والله هو ده الموجود وليس في الامكان احسن مما كان ... كنت فاكره اننا عدينا المرحلة دي ونفس الكلام ده  اللي كان بيتقال ايام المخلوع 
والله انا كنت شايفه اننا كنا جبنا رئيس مدني مؤقت لحد ما ينكتب الدستور او حتى مجلس رئاسي (زي ما عملت تونس وليبيا) وبعدين نبدأ بقى على نضافة..أنا مقتنعة تماما بمنطقية ده ومش شايفه ان فيه حاجة تستدعي اني اتنازل عن حاجة منطقية وسليمة تماما عشان الهبل اللي بيحصل واصل هو ده اللي حصل وحنعمل ايه.. خلاص يبقوا هم يكملوا بقى بطريقتهم 
رغم كل ده مقدرتش امنع نفسي من متابعة النتيجة اللي نزلت طبعا على دماغي زي دش بارد عشان آخد آخر قفا من الناحية اللي يظهر كان لسه عندي أمل فيها شعبنا المحترم واللي يظهر حيفضل مكلبش في القفص ورافض يطير..والقفص الضيق الكئيب اللي اعرفه احسن من السماء الواسعة اللي ما اعرفهاش!
الناس بتقول المره دي بقى مينفعش لازم كله ينزل
بس المعضلة الشديدة اللي مش حاسس بيها غيرمؤيدين الثورة "فلول والا اخوان؟!"
المشكلة فعلا ان ما اسخم من ستي الا سيدي
الاخوان طبعا بانوا قوي على حقيقتهم للكانوا مخدوعين فيهم بس مش معقول عشان منخليهمش يكسبوا نحط ايدينا في ايدين ملوثة بدماء الشهداء في ايدين اللي سرقوا فلوسنا ..حقيقي منطق غريب
ممكن البعض يشوف ان الاخوان على الاقل ممكن نحجمهم (زي ما حصل في موضوع الجمعية التأسيسية) 
لكن فيه ناس مش قادرة تآمنلهم أو تنسى صفقاتهم المشبوهة وما قالوه عن الثوار وده طبعا حقهم لكن ده مايدلهمش في نفس الوقت الحق انهم يقفوا جنب قتلة الثوار انفسهم
على الأقل لو مش حتقدر خالص تصوت للاخوان ونفسك مش جايباك.. ياريت متنزلش الانتخابات خالص اكرملك من انك تدي صوتك للي قتلونا ولسه بصوتك حيقتلوا مننا كتير قوي