النهضة ..والكلاب!

بالأمس مات الناس .. وقالت الداخلية "معندناش قناصة"!
اليوم اتعض الناس..وقال الجيش "معندناش كلاب"!

أمال الصور التي رأيناها جميعا ونشرتها أغلب الصحف والمواقع والتي يظهر فيها ذلك الأسد الغضنفر (الخالق الناطق الوسيم "روي" في فيلم الشموع السوداء والذي حكى البطل عن تاريخه البطولي ككلب بوليسي.. والخالق الناطق برضه كلاب الكرنك) هل هذه الصور فوتوشوب..ويكون اللي ماسكه الجندي ده ليس كلب وإنما  مثلا بطة ويكون مثلا كان بيقدم شو استعراضي تبع السيرك!
لا القوات المسلحة خرجت علينا بتصريح تحفة قاطع لكل شك (عشان اصحاب النفوس المريضة المرتابة في كل شيء) وأكدت ان الكلب الغضنفر" ده ما هو إلا كلب ضال يعطف عليه الجنود وبيرموله لقمة..فيظهر ان موضوع اللقمة ده أثر في نفسه وكلنا عارفين وفاء الكلاب فمخلصهوش يسيب الجنود لوحديهم وراح يساعدهم قدام الناس الوحشين المجرمين اللي كان كل اللي بيعملوه انهم بيهتفوا ضد المحافظ
يعني ان اللي في الصور ده مجرد كلب ضال ! ياخبر أمال الكلاب المعصعصة الهزيلة اللي عندنا دي إيه! ده طلع ان الكلاب الضالة في كفر الشيخ حاجة تانية خالص متربية على الغالي..والا جايز الزبالة في كفر الشيخ بقى حاجة تانية..يعني جايز الكلاب الضالة في كفر الشيخ بتلاقي الزبالة مليانة حمام وفراخ..بقى كلاب القاهرة كده وكلاب كفر الشيخ كده! أنا لو من كلاب القاهرة أعمل احتجاج على الظلم ده..ده لو شافوا الصور اعتقد انهم كلهم حيطالبوا بنقلهم إلى كفر الشيخ فورا

الغريب ان رغم كل المذابح اللي تكررت..وكل المشاكل والمآسي اللي حصلت لسه الرد هو هو..والاستهبال هوهو والرغبة في انهم يستعمونا هي هي وده ببساطة لأن المسئولين هم هم..حتى لوتغيرت بعض الوجوه لكن النظام برضه هو هو
(وكفاية بقى هوهوه أحسن الكلب الضال يزعل مني ويجي يعضني أنا كمان)