هناك فرق

يااااااسلام...هي وصلت للدرجة دي؟



اعذروني أنا مفروسة جدا..
ومش قادرة اتحكم في اعصابي



الحكاية ان السيد المحترم رئيس وزراء
بريطانيا تعهد بتغيير قوانين بلاده
بس عشان خاطر الست تسيبي ليفني
وزيرة خارجية اسرائيل السابقة
بعد ما صدر بشأنها قرار استدعاء من محكمة
بريطانية لاتهامها بجرائم حرب ضد الفلسطينيين
اثناء العدوان على غزة في الشتاء الماضي


السيد براون زعل قوي قوي وسارع بالاتصال بليفني
وهو شديد الخجل ليتعهد لها بانه حيعمل المستحيل
عشان يغير القوانين السيئة جدا اللي بتسمح
بحاجة مخجلة زي كده
"وقوليلي بس على اللي يتعرضلك"



لم يفطن السيد براون انه ببساطة شديدة بهذا الكلام
يشكك في نزاهة القضاء البريطاني وقدرته على
اتخاذ قرارات سليمة
ويشكك في مدى صحة القوانين والتشريعات البريطانية
ويؤكد بكل وضوح ان هذه القوانين إنما هي قوانين تفصيل
يتم تفصيلها خصيصا لاغراض معينة
ولو مانفعتش التفصيلة دي وماكنتش في مصلحتنا
نقص واحدة تانية



وواضح ان هذا القانون تم وضعه لغرض آخر
وكوسيلة لملاحقة من يرغبون هم في ملاحقته
ولايجب أن يتعدى ذلك
فهناك فرق كبير..يعني بساطة ناس ناس
وحنروح بعيد ليه..فمنذ فترة ليست ببعيدة صدر قرار
بضبط الرئيس السوداني من قبل محكمة العدل
الدولية و سارع المجتمع الغربي كله وطبعا على
رأسه بريطانيا للترحيب بالقرار والاشادة به
وبالعدالة التي تحققت أخيرا

ورغم بشاعة العدوان الاسرائيلي على غزة المؤكد
والموثق من قبل جهات دولية "حد فاكر تقرير
جولدستون الذي تم دفنه بنجاح" لكن القرار ضد
ليفني قوبل بالاستنكار الشديد

بصراحة أنا زهقت من كلمة أشمعنى التي صرت
ارددها كالبلهاء دون أي اجابة



بس كمان المحكمة البريطانية دي سابت
رئيس الوزراء الاسرائيلي المسئول الأول
عن المذابح ووزير الدفاع المسئول التالي له
ورئيس الاركان المسئول الذي يليه
ومسكت في وزيرة الخارجية التي في النهاية
لم تصدر هي أي قرار بشأن شن الهجمات
غريبة برضه والا ده علشان نقفل على الموضوع

==============

مش عارفة ازاي بعد كل الكلام ده اللي يحرق الدم
اكتب تهنئة بالعام الهجري الجديد
لكن هذا هو الحال ..حال المسلمين
يمر عليهم العام تلو الآخر
والعيد تلو الآخر
ولا تغيير ..إن لم يكن للأسوأ

عموما كفاية نكد لحد كده

وكل عام وانتم جميعا بخير
وكل عام والحال غير الحال
ولو تغيير واحد إيجابي
ربنا قادر على كل شيء